ПУЛ

Одамизод на танҳо аз норасоии витаминҳо, балки аз камии пул ҳам ба касалиҳо гирифтор мегардад.

***

Дуо не, пул гиред.

***

Пул: бо ту дилам кӯҳ барину бе ту дилам мӯ барин.

***

Гулӯи чархи гардунро бо пул равған кунед, буҷулатон ҳамеша олчӣ мехезад.

***

Пул қоғази бекора бошад, ки одамро ба маймунбозӣ медарорад.

***

Пул душмани ашаддии одамизод аст, вале то ҳол аз он дӯсти содиқтаре кашф накардаанд.

***

Пул боли парвози мансаб аст: он ҳар чӣ қадар бисёр бошад, одам ҳамон қадар баландтар парвоз мекунад.

***

Ҷӯраи аз ҳама бовафои одамизод кисааш аст.

***

Булбул гул гуфта нолад, одам пул гуфта менолад.

***

Пул бошад, ятим падару модар ёфта метавонад.

***

Нахонеду надонед, ки шумо пул дошта бошед, ҳама шуморо олими ҷаҳоншумул мегӯянд.

***

Одам пир шавад, ки дар дилаш ҳирси пулу пулғундорӣ ҷавон мемонад.

***

Айби асосии одам кампулии ӯст.

***

Кураи замин болои тир истад, зини мансабҳо болои пул.

***

Дилёб не, пулёб шавед. Пул бошад, тамоми дилҳо занҷирбанду зердасти шумо хоҳанд шуд.

***

Худо яккаву ягона не, балки барои баъзеҳо пул ҳам Худо будааст.

***

Пул чирки даст аст?! Ку ҳунарманду савдогаре, ки чирки дастро пул кунад!

***

Бахт дар пул не, дар бисёрии он аст.

***

Васияти банкир: аз пӯсти баданам ҳамёни пул созед.

***

Пул чизи нағз бошад, ки душмани шахси пулдор аст.

***

Пул набошад, ба даст овардани он бахт аст. Агар пулу давлати одам зиёд шавад, худи бахт даркор нест.

***

Забони пул аз дами шамшеру ҳукми қонун ҳам тезтар аст.

***

Агар Худои одамизод пул шавад, он гоҳ оқибаташро худи Худо ҳам

намедонад.